1-1-1

ཇོ་ནང་ཆོས་མཛོད་ཆེན་མོ་ལས། རྗེ་བཙུན་ཏཱ་ར་ནཱ་ཐའི་གསུང་འབུམ། ༼ཀ༽

1-1-2

1-1-3

༄༅། །རྒྱལ་ཁམས་པ་ཏཱ་ར་ནཱ་ཐས་བདག་ཉིད་ཀྱི་རྣམ་ཐར་ངེས་པར་ བརྗོད་པའི་དེབ་གཏེར་ཤིན་ཏུ་ཞིབ་མོ་མ་བཅོས་ ལྷུག་པའི་རྟོགས་བརྗོད་ཅེས་བྱ་བ་ བཞུགས་སོ། ། ༄༅། །ན་མོ་གུ་རུ་བུདྡྷ་བོ་དྷི་ས་ཏྭེ་བྷྱཿ ༀ་སྭ་སྟི་སརྦ་པྲ་ཛཱ་བྷྱཿ རྒྱལ་ཁམས་པ་ཏཱ་ར་ནཱ་ ཐས་བདག་ཉིད་ཀྱི་རྣམ་ཐར་ངེས་པར་བརྗོད་པའི་དེབ་གཏེར་ཤིན་ཏུ་ཞིབ་མོ་མ་བཅོས་ལྷུག་ པའི་རྟོགས་བརྗོད་ཅེས་བྱ་བ། བླ་མ་རྣམས་ལ་ཕྱག་འཚལ་ལོ། །རྟག་བརྟན་གཡུང་དྲུང་འོད་ གསལ་རྡོ་རྗེའི་སེམས། །གདོད་ནས་རྣམ་དག་མཁའ་བཞིན་འཕེལ་འགྲིབ་བྲལ། །ཆོས་ཀུན་ འབྱུང་བ་སངས་རྒྱས་ས་བོན་ཏེ། །རང་སེམས་གདོད་མའི་མགོན་པོ་རྒྱལ་གྱུར་ཅིག །གང་ ཞིག་དངོས་གྲུབ་གཉིས་ཀྱི་རིན་ཆེན་གཏེར་གྱུར་བྱིན་རླབས་རླབས་འཕྲེང་གཡོ་བ་གདམས་ པའི་ཆུ་གཏེར་རྩ་བརྒྱུད་བླ་མའི་ཚོགས་རྣམས་དང༌། །གང་ལས་འགྲོ་རྣམས་སོ་སོའི་བསམ་ པ་དང་མཐུན་ཚངས་པའི་འཁོར་ལོ་བསྐོར་མཛད་དོན་གཉིས་ཕུན་སུམ་ཚོགས་གྱུར་རྫོགས་ སངས་རྒྱས་རྣམས་དང༌། །གང་འདིར་ཟབ་ཞི་སྤྲོས་བྲལ་རང་བཞིན་གདོད་ནས་དག་ཅིང་དྲི་ མ་རྣམ་སྤངས་འགོག་པའི་བདེན་གྱུར་ལུང་རྟོགས་དང་བཅས་དམ་པའི་ཆོས། །སྲིད་འདིར་ ནག་ཕྱོགས་མུན་སེལ་མཐའ་དག་ཡོན་ཏན་ཆ་ཤས་རབ་རྫོགས་ཐེག་གསུམ་འཕགས་ཚོགས་ རྣམས་ལའང་གུས་པས་དངོས་པོ་ཀུན་གྱིས་འདུད། །སེམས་ཉིད་ཐོག་ཐ་མེད་པའི་བརྗོད་

1-1-4

བྲལ་ལས། །སྲིད་ཞི་ཀུན་ཏུ་འཆར་བ་གཉུག་མའི་ངང༌། །འདི་ནི་ཆོ་འཕྲུལ་མཐའ་ཡས་སྟོན་ པའི་ཕྱིར། །དེ་འདྲ་མཐའ་དག་སུ་ཡིས་བརྗོད་པར་ནུས། །བླུན་པོས་བརྗོད་པ་ཇི་ལྟར་འབད་ ན་ཡང༌། །གཞན་གྱི་དོན་དུ་འགྱུར་བ་མ་མཐོང་བས། །རེ་ཞིག་མི་སྨྲའི་བརྟུལ་ཞུགས་འཛིན་ པ་མཆོག །སྨྲ་ན་འཕགས་པའི་རྣམ་ཐར་བརྗོད་པར་སྨོན། །རང་གི་ཡོན་ཏན་བརྗོད་པ་དམན་ པའི་ལུགས། །རྫུན་དུ་བརྗོད་ན་འཕགས་པ་རྣམས་ཀྱིས་ཁྲེལ། ཁྱད་འཕགས་ཡོན་ཏན་བདག་ ལ་བརྗོད་རྒྱུ་མེད། །གནས་ཚུལ་སྒྲོ་སྐུར་མེད་པར་བརྗོད་ན་{ཀེ[ཀོ] །གཞན་གྱིས་ནན་ཏན་ བསྐུལ་བའི་ཕྱིར། །རང་གི་རྣམ་ཐར་མདོ་ཙམ་བཤད། །དུས་ཀྱང་དྲོན་དུ་འགྱུར་མོད་ཀྱི། ། ཤེས་ལྡན་ཐམས་ཅད་བཟོད་པར་མཛོད། །དེ་ཡང་གདོད་མའི་མགོན་པོ་དང༌། དེ་བཞིན་ཉིད་ དང༌། ཟག་པ་མེད་པའི་དབྱིངས་དང༌། ཆོས་ཉིད་ཀུན་ཏུ་འགྲོ་བ་དང༌། དེ་བཞིན་གཤེགས་ པའི་སྙིང་པོ་དང༌། རང་བཞིན་གྱི་འོད་གསལ་བ་དང༌། དང་པོའི་སངས་རྒྱས་དང༌། རྒྱུའི་རྡོ་རྗེ་ འཆང་བ་ལ་སོགས་པ་མཚན་གྱི་རྣམ་གྲངས་བརྗོད་ཀྱི་མི་ལང་བས་བསྙད་པར་བྱ་བ། སེམས་ ཉིད་རིག་པའི་སྐྱེས་བུ་ཆེན་པོ་གང་དེའི་མཛད་འཕྲིན་རྨད་དུ་བྱུང་བ་ནི། རྣམ་པར་བྱང་བའི་ ཆོས་མཐའ་དག་ཡོངས་སུ་སྤེལ་བ་དང༌། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ ཐམས་ཅད་ཀྱི་སྐུ་དང༌། ཡེ་ཤེས་དང༌། ཡོན་ཏན་དང་མཛད་པ་འཕྲིན་ལས་ཐམས་ཅད་འདུས་ བྱས་ཀྱི་དབུས་སུ་ཉམས་པར་མི་འགྱུར་བའི་གཏེར་ཆེན་པོ། མི་འདྲུལ་ཞིང་བསྲུང་བར་མཛད་ པ་དང༌། ནམ་ཞིག་རིགས་ཡོངས་སུ་སད་པ་ནས་བརྩམས་ཏེ། གཏེར་གྱི་བུམ་བཟང་དེ་ཉིད་ རིམ་པས་ཕྱུང་སྟེ། རང་བཞིན་གྱི་འདོད་དགུ་བདེ་བླག་ཏུ་སྩོལ་བར་མཛད་པ་ནི། སྲིད་ཞི་ ཐམས་ཅད་ཀྱི་མགོན་པོ་དཔལ་ཡོངས་གྲུབ་ཆེན་པོའི་རྣམ་ཐར་བཟང་པོ་འཕེལ་འགྲིབ་མེད་ པའོ། །དེ་ལྟར་ཡང༌། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། ། དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་པ་ལྟར།

1-1-5

གཅིག་པུར་མ་བས་ཏེ་མཁའ་ཁྱབ་མཁའི་རྡོ་རྗེ་ཅན་དང༌། ཆ་མེད་དང༌། ཀུན་འགྲོ་དང༌། ཁྱབ་བདག་དང༌། ཀློང་ཡངས་དང༌། ཁྱབ་གདལ་ཆེན་པོ་ཡིན་ནོ། །དེ་ལྟ་བུའི་གདོད་མའི་ཡེ་ ཤེས་དེ་དང་ལྷན་ཅིག་སྐྱེས་པ་ངོ་བོ་དེ་ཉིད་དང་གཞན་དུ་བརྗོད་དུ་མེད་པ་ཀུན་གཞི་རྣམ་པར་ ཤེས་པ་ཞེས་བྱ་བ། སྲིད་པའི་བདག་པོ་ཞིག་ཡོད་དེ། ཇི་སྐད་དུ། དེ་བཞིན་ཀུན་གཞིའི་ཆུ་བོ་ ཡང༌། །རྟག་ཏུ་ཡུལ་གྱི་རྐྱེན་གྱིས་འབྱུང༌། །རྣམ་ཤེས་རྦ་རླབས་སྣ་ཚོགས་ཀྱིས། །རབ་ཏུ་གཡོ་ བས་གར་བྱེད་དོ། །ཞེས་པ་ལྟར། ལས་དང་ཉོན་མོངས་པའི་ཆུ་ཀླུང་བྱེ་བ་ཕྲག་བརྒྱ་འབབ་ ཅིང་བསྟེན་པའི་རྒྱ་མཚོ་ཆེན་པོ་སྲིད་པ་ཐོག་མ་མེད་པ་ནས། ཡང་དག་པའི་མཐའ་མངོན་དུ་ མ་བྱས་པ་དེ་སྲིད་དུ་རྟག་ཏུ་འབབ་པ་རྣམ་པར་ཤེས་པའི་ཚོགས་བདུན་དང༌། སྣ་ཚོགས་པའི་ ཚོར་བ་དང༌། འདུ་ཤེས་ཐ་དད་པ་དང༌། གཞལ་དུ་མེད་པའི་འདུ་བྱེད་དང་བཅས་པའི་ཚོགས་ ཀྱི་རླབས་འཕྲེང་གཡོ་བ། གནས་སྣོད་ཀྱི་འཇིག་རྟེན་དང༌། དོན་གཟུགས་སོགས་ཡུལ་ལྔ་ དང༌། ལུས་དབང་པོ་ལྔ་རུ་སྣང་བའི་རྣམ་རིག་གི་གཟུགས་བརྙན་རྣམ་པར་བཀྲ་བ་རྟག་ཏུ་ འཆར་ཞིང་ནུབ་པར་བྱེད་པའི་ཀུན་གཞིའི་ཆུ་གཏེར་ཆེན་པོ་དེ་ལས། འགྲོ་བ་དྲུག་ཏུ་བརྒྱུད་ མ་ནས་བརྒྱུད་མར་འཁོར་བའི་རྣམ་པར་ཐར་པའི་མཚན་མ་ཡ་མ་ཟུང་བརྗོད་པའི་ཡུལ་ལས་ འདས་པ་དག་ཡོད་མོད་ཀྱི། འཁོར་བ་ཐོག་མ་མེད་པ་ནས་སྲིད་པར་འཁྱམས་པའི་སྣང་ཚུལ་ དེ་ལྟ་བུ་ནི་བརྗོད་ཀྱིས་ཀྱང་ག་ལ་ལང་ཞིང༌། མ་རིག་པའི་སྒྲིབ་གཡོགས་ཀྱི་གཞན་དབང་ ལས་ཕལ་ཆེར་དྲན་པའི་ལམ་ན་མི་སྣང་བས་དེར་བས་ལ། རྫུ་འཕྲུལ་ལ་སོགས་པའི་མངོན་ པར་ཤེས་པ་དྲུག་དང༌། ཏིང་ངེ་འཛིན་དང༌། གཟུངས་དང༌། ཡེ་ཤེས་ལ་སོགས་པ་ས་དང་ ལམ་གྱི་ཡོན་ཏན་ཁྱད་པར་ཅན་མ་ཐོབ་བའི་ཕྱིར། མི་ཆོས་བླ་མ་ལས་གྱུར་པ་ཡང་དག་པ་མ་ ཡིན་པའི་ཚིག་གིས་ལས་ཀྱི་སྒྲིབ་པ་མཆོག་ཏུ་ལྕི་བ་སྒྲུབ་བར་ག་ལ་སྤོབས། དེར་མ་ཟད་རྒྱས་ བ་སྲས་བཅས་ཀྱི་ཡོན་ཏན་ཁྱད་པར་ཅན་བརྗོད་དུ་ཡོད་བཞིན་དུ། སོ་སོ་སྐྱེ་བོ་ཉོན་མོངས་

1-1-6

པའི་འདམ་དུ་བྱིང་བ། རྨོངས་པས་རྣམ་པར་གཡོགས་པ། སྲིད་པའི་ཆུ་བོ་ལས་མ་བརྒལ་ བ། སྲེད་པས་བཅིངས་པ། ཡང་དག་པའི་དོན་ལ་ཁོ་རེ་ཆུང་བ། བདག་ལྟ་བུའི་ལས་སྣང་གི་ འཆར་སྒོ་ཡི་གེར་དགོད་པར་རྩོམ་པ་ནི་ངལ་བ་ཁོ་ནའི་རྒྱུ་ཡིན་མོད་ཀྱི། བསྐུལ་བ་པོ་ཤིན་ཏུ་ མང་པོ་དག་གི་ངོ་མ་ཆོག་པས་ཅུང་ཟད་སྨྲ་བར་བགྱི་ན། སྔོན་དམ་པའི་ཆོས་ཀྱི་ཕྱོགས་སུ་ཅུང་ ཟད་བྱ་བ་བྱས་ཤིང༌། སྨོན་ལམ་རྣམ་པར་དག་པ་ལན་འགའ་ཟུང་བཏབ་པ་འདྲ་སྟེ། ཚེ་འདིར་ དམ་པའི་ཆོས་ཀྱི་བྱ་བ་སྒྲུབ་པ་ལ་བར་ཆད་ཀྱི་སྒོ་མེད་པའི་ཁྱིམ་དུ་སྐྱེས་ཤིང༌། གང་གིས་ཁྱིམ་ དུ་སྲོག་གཅོད་པ་སྤངས་ཤིང་དཀོན་མཆོག་གསུམ་དང༌། ཡི་དམ་གྱི་ལྷ་རྣམས་དང་ཆོས་སྐྱོང་ དམ་པ་ཡེ་ཤེས་ཀྱི་སྤྱན་ལྡན་རྣམས་གུས་པས་བསྟེན་པ་དང་མཆོད་པ་ལ་བརྩོན་ཞིང་བཟླས་ བརྗོད་དང་སྒྲུབ་པས་དུས་འདའ་བའི་རིགས་སུ་སྐྱེ་བ་ཉེ་བར་བཟུང༌། ཆུང་ངུ་ནས་རྗེ་བཙུན་ ཐུགས་རྗེ་ཅན་རྣམས་ཀྱི་བཀའ་དྲིན་ལས་ཆོས་ཀྱི་སྣང་བས་དུས་འདས་ཆོག་པ་བྱུང་བ་དང༌། ངར་འཛིན་གྱི་སྣང་བ་ཅུང་ཟད་སྲབ་ཅིང༌། དམ་པའི་ཆོས་ཀྱི་གཏམ་ཟབ་མོ་དང༌། སངས་ རྒྱས་ཀྱི་མཛད་པ་རྨད་དུ་བྱུང་བ་དང༌། སྐྱེས་པའི་རབས་རྣམས་དང༌། བླ་མ་དམ་པ་རྣམས་ཀྱི་ རྣམ་པར་ཐར་པ་མཐོང་བའམ་ཐོས་ན་ཡིད་དགའ་བ་དང་སྐྱོ་བ་ཟུང་དུ་འབྲེལ་བས་ཁྱབ་ཅིང་ བ་སྤུ་ལྡང་བ་དང༌། གཏིང་ནས་མཆི་མ་འཁྲུག་པའི་དད་པ་གསུམ་ལྷག་པར་སྟོབས་སུ་གྱུར་ པས། ཆོས་བརྒྱད་ཀྱི་སྣང་བ་རགས་པ་འཕྲལ་དུ་འགོག་ནུས་པ་ཙམ་རྟག་ཏུ་འོང་ཞིང༌། ཁྱད་ པར་བྱིས་པ་མནོ་མི་ཤེས་པའི་དུས་ནས་ཀྱང༌། གསང་སྔགས་ཀྱི་ལྷའི་སྐུ་བརྙན་མཐོང་བའམ། ཆོ་ག་དང་བཟླས་བརྗོད་བྱེད་པ་དང༌། ཀུན་སྤང་གི་སྤྱོད་པ་ཅན་དག་མཐོང་བ་དང༌། བསྐྱེད་ རྫོགས་ཀྱི་གཏམ་དང་ཆེ་བ་ཅུང་ཟད་ཐོས་པ་དང༌། མི་རྟོག་པ་དང་ལུང་སྒོམ་པ་ལ་སོགས་པའི་ རྣམ་ཆ་མཐོང་བའི་ཚེ། བདག་ཀྱང་འདི་ལྟ་བུར་གྱུར་ན་ཅི་མ་རུང་སྙམ་པ་དང༌། དགའ་བདེས་ ཉེ་བར་དྲངས་ཏེ་ཉིན་མཚན་གྱི་སྣང་བ་ཡུལ་ཡུལ་པོར་འགྱུར་བ་དང༌། འགྲོ་བ་ལ་བརྩེ་སེམས་

1-1-7

ཀྱང་ཆུང་ངུའི་དུས་ནས་ཅུང་ཟད་འཆར་བ་དང༌། སངས་རྒྱས་ཐོབ་འདོད་ཀྱི་བསམ་པ་གཏིང་ ཚུགས་པ་ཞིག་ཀྱང་དྲན་པ་རྙེད་ཙམ་ཉིད་ནས་ཡོད་ཅིང༌། ད་ལྟ་ཟབ་མོའི་ཆོས་མང་པོ་ལ་སྙིང་ ཐག་པ་ནས་ངེས་པ་ཅུང་ཟད་སྐྱེ་བར་སྣང་བའི་ཕྱིར་རོ། ། འདིར་སྨྲས་པ། རང་བློ་རང་ལ་ལྐོག་ཏུ་མ་གྱུར་བས། །འདི་དག་རང་གིས་རང་ལ་མ་ ཁྲེལ་ཙམ། །འདི་ཙམ་རྫུན་མེད་འདི་ལས་ལྷག་པའང་མེད། །གང་གི་དཔང་པོར་སྤྱན་ལྡན་ འཕགས་རྣམས་བཞུགས། ། དེ་ལྟར་གླེང་སློང་པའི་དགེ་མཚན་ཡོངས་སུ་སྤེལ་ནས་བདག་ཉིད་ཀྱི་རིགས་རུས་དང་ འབྲེལ་བའི་གཏམ་ཅུང་ཟད་ཅིག་བརྗོད་ན། སྐད་གཉིས་སྨྲ་བ་མཐུ་སྟོབས་དབང་ཕྱུག་རྗེ་ བཙུན་རྭ་ལོ་ཙཱ་བ་རྡོ་རྗེ་གྲགས་པ་ཞེས་མཚན་སྲིད་པ་གསུམ་དུ་ཡོངས་སུ་གྲགས་པ་དེ་ཉིད་ཀྱི་ སྐུའི་རིགས་སུ་འཁྲུངས་ཤིང་ཐུགས་ཀྱི་སྲས་སུ་གྱུར་པ་ནི། སྐད་གཉིས་སྨྲ་བ་ཆོས་རབ་ཡིན་ ལ། དེ་ཉིད་ཀྱི་སྐུའི་རིགས་ལ་རྭ་ཤར་ནུབ་གཉིས་སུ་གྱེས་པ་ལས། ནུབ་པར་མཚན་གསོལ་ བ། སློབ་དཔོན་ཆེན་པོ་རྭ་ཡེ་ཤེས་སེང་གེ་དང༌། དེའི་སྲས་རྭ་འབུམ་སེང་སྟེ། ཡབ་སྲས་དེ་ དག་ནི་སྤྲུལ་པའི་སྐྱེས་མཆོག་ལུང་དང་རྟོགས་པ་མཐའ་ཡས་པའི་མངའ་བདག་ཆེན་པོ་ཡིན་ ནོ། །རྭ་ཤར་པར་གྲགས་པ་དྷརྨ་སེང་གེ་བ། དེའི་སྲས་དཀོན་མཆོག་སེང་གེ། དེའི་སྲས་ཤེས་ རབ་རྒྱལ་མཚན་ཏེ། དེ་གསུམ་ཡང་མཁས་ཤིང་ནུས་པ་ཐོབ་པའི་རྡོ་རྗེ་འཛིན་པ་ཆེན་པོ་ཤ་ སྟག་ཏུ་བྱོན་ནོ། །རྭ་ཤེར་རྒྱལ་ལ་སྲས་གསུམ་མངའ་བ་ལས། དཀོན་མཆོག་རྒྱལ་མཚན་སྐུ་ མཆེད་ནི་གཡས་རུ་ནུབ་མདར་འཁྲུངས་ཤིང༌། གཙང་རོང་དང་རུ་མཚམས་སུ་འགྲོ་བའི་དོན་ མཛད་པ་ཞིག་བྱུང་ཞེས་གྲགས་ལ། སྲས་ཆེ་བ་རིན་ཆེན་རྒྱལ་མཚན་ནི། ཡར་འབྲོག་འཕྲང་ དུ་ཡོན་བདག་མོ་ནམ་མཁའ་འབུམ་ཞེས་བྱ་བ་ལས་འཁྲུངས་ཤིང༌། ཆེར་སྐྱེས་ནས་ཡབ་ལ་ གཤིན་རྗེ་གཤེད་དགྲ་གདོང་འཇིགས་གསུམ་དང་མགོན་ནག་ལ་སོགས་པའི་རྒྱུད་ལུང་མན་

1-1-8

ངག་ཐམས་ཅད་གསན་ཏེ་མཁས་པར་སྦྱངས། དུས་འཁོར་ལ་སོགས་པ་ཡབ་ཆོས་གཞན་ ཡང་ཅི་རིགས་པ་མཁྱེན། སྨན་དཔྱད་དང་སྐར་རྩིས་སོགས་ལ་མཁས་པ་ཞིག་བྱུང༌། ཡར་ འབྲོག་འཕྲང་རིགས་ཀྱི་ནུབ་སྟོད་དུ་གཉན་དང་ཇོ་བོ་ལ་སོགས་པས་སྦྱིན་བདག་བྱས་ནས་ གཤིན་རྗེའི་ལྕགས་མཁར་ལ་དཔེ་བྱས་པའི་མཁར་བརྩིགས་ནས་དེར་བཞུགས་པས། རྭ་ ལྕགས་མཁར་བ་ཞེས་ཐོགས་སོ། །སྒྲུབ་པས་ནུས་མཐུ་ཆེན་པོ་ཡང་མངོན་དུ་གྱུར། ཐོང་ ལྕགས་ཆག་པ་ལ་ལྗགས་བཏབ་པས་ཞི་ཞིང་འབྲེལ་བ་དང༌། ཐོག་སེར་དང་ཆོ་འཕྲུལ་ལ་ སོགས་པ་ཐོགས་མེད་དུ་སྒྲུབ་པ་ཞིག་གོ ། འདིར་སྨྲས་པ། དེ་ལ་རིགས་སྲས་ལྔ་ཙམ་ཡོད་པ་ལས། །རྡོ་རྗེ་འཛིན་པའི་མཚན་གྲགས་ ཐོན་པ་ནི། །གསུམ་པ་ཆོས་དབྱིངས་པ་ཉིད་ཡིན་ཞེས་ཐོས། །སྔགས་ཀྱི་ལག་ལེན་བཤད་ བཀའ་ལ་སོགས་པ། །ལྷད་མེད་ཚིག་གི་བརྒྱུད་པ་མ་ཉམས་ཤིང༌། །བསྒྲུབས་པའི་བྱིན་ རླབས་རྒྱུན་ཡང་ཆེ་བར་ཡོད། །ཡར་འབྲོག་ཕྱོགས་དང་གཙང་རོང་ལ་བཞུགས་པའི། །རྭ་ ཡི་རིགས་བརྒྱུད་མང་པོ་ཡོད་པ་རྣམས། །ཕན་ཚུན་ཐུགས་མཐུན་གྲྭ་རིགས་མང་བ་དང༌། ། ཡོན་བདག་ལ་སོགས་ཕུན་སུམ་ཚོགས་པར་བྱུང༌། །དེ་ཡི་སྲས་ནི་བརྩོན་འགྲུས་སེང་གེ་ ཡིན། །གསང་ཕུར་འཇམ་དབྱངས་ཤཱཀྱ་གཞོན་ནུ་ལ། །ཕར་ཚད་བསླབས་ཤིང་ཕ་མེས་ཆོས་ ལ་མཁས། །འབའ་ར་བ་ལས་རླུང་ཕྱག་ཞུས་ཏེ་འབྱོངས། །དེ་ལ་སྲས་གཉིས་ཆོས་ཀྱི་བསམ་ འགྲུབ་དང༌། །ཆོས་ཀྱི་བཀྲ་ཤིས་ཞེས་བྱས་རྙིང་མ་བསླབས། །ཁ་ཐུན་ཚེ་བདག་འཆར་ཁ་ ལ་སོགས་པའི། །གཤིན་རྗེ་གཤེད་དང་ཕུར་པ་ཇོ་མོ་ལུགས། །ཉང་གི་གཏེར་ཆོས་སོགས་ ལ་མཁས་པར་བྱས། །ཚེ་བདག་བསྒྲུབས་པས་ནུས་པ་ཆེ་བར་བྱུང༌། །དང་པོའི་སྲས་ནི་ཤེས་ རབ་སེང་གེ་དང༌། །ཕྱི་མའི་སྲས་ནི་ཚེ་བདག་སྐྱབས་ཞེས་བརྗོད། །ཕྱི་མས་ལ་སྟོད་ཕྱོགས་ སུ་བྱོན་ཞེས་ཟེར། །དང་པོའི་སྲས་ནི་ཀུན་དགའ་སེང་གེ་ཡིན། །མངོན་དགའ་ཆོས་སྡེར་པོད་

1-1-9

ཆེན་བཞི་ལ་བསླབས། །ཕྱི་ནས་བོ་དོང་ཕྱོགས་ལས་རྣམ་རྒྱལ་དང༌། །གཞན་ཡང་བླ་མ་མང་ པོ་བསྟེན་པ་ལས། །གསང་སྔགས་གསར་མའི་ཆོས་ལུགས་མང་པོ་ཐོས། །ཕ་མེས་རྣམས་ལ་ ལས་ཚོགས་སྣ་ཚོགས་པའི། །ལག་ལེན་ཁྲིགས་ཆགས་མཐོང་བརྒྱུད་ཡོད་ན་ཡང༌། །ཕ་ཆོས་ རྣམས་ཀྱི་དབང་བཀའ་བར་དུ་ནུབ། །ཆོས་རྗེ་ངག་དབང་པ་ལ་དབང་རྣམས་ཞུས། །མོས་ ཞེན་དབང་གིས་རྡོ་རྗེ་འཇིགས་བྱེད་བསྒྲུབས། །རེ་མ་ཏཱི་ཡི་ཞལ་ཡང་མཐོང་བར་གྲགས། ། སྐབས་དེར་ཡར་འབྲོག་ཁྲི་དཔོན་དང་ཟློས་ནས། །གཡོར་པོ་སྟོད་ཀྱི་ཕྱོགས་ན་སློབ་མ་དང༌། ། ཡོན་བདག་མང་དུ་ཡོད་པའི་ཕྱོགས་སུ་ཕྱིན། །དགྲ་བོའི་ཡུལ་དུ་མཐུ་རྟགས་མང་དུ་བསྟན། ། གནས་གཞི་རི་ཁྲོད་ཆུང་ངུ་མང་དུ་བཏབ། །སྡིག་བཤགས་དོན་དུ་བཅོམ་ལྡན་ཀུན་རིག་གི ། བསྙེན་སྒྲུབ་བྱས་ཤིང་གཞན་ཡང་བྱེད་དུ་བཅུག །གདུང་ལ་རྡོ་རྗེ་སེམས་དཔའ་རང་བྱོན་ བྱུང༌། །དེ་ལ་སྲས་གཉིས་སེང་གེ་དཔལ་ལྡན་དང༌། །ཆོས་ཀྱི་སེང་གེར་བོད་པ་རྣམ་པ་གཉིས། ། ཕྱི་མས་ཀུན་མཁྱེན་སངས་རྒྱས་འཕེལ་བ་ཡི། །ཆོས་གྲྭར་བྱོན་ཞིང་རབ་འབྱམས་སྨྲ་བ་དང༌། ། རིག་གནས་ཕྲ་མོ་ཡང་ནི་མང་པོ་མཁྱེན། །ཡི་དམ་དམར་ནག་འཇིགས་གསུམ་ཡུན་རིང་ བསྒྲུབས། །རབ་འབྱམས་སྨྲ་བ་འཇམ་དཔལ་གྲགས་པ་ལ། །བོ་དོང་ལུགས་ཀྱི་ཆོས་ལུགས་ མང་པོ་གསན། །གཡས་རུ་ཤངས་སུ་ཕ་རྒོད་བསོད་བཟང་ལ། །ཤངས་ཆོས་ཡོངས་རྫོགས་ ཞུས་ནས་ཡུན་རིང་བསྒོམས། །ཆོས་སྐྱོང་མྱུར་མཛད་ཡེ་ཤེས་མགོན་པོ་དང༌། །དཔལ་མགོན་ མ་ནིང་དམ་ཅན་མང་པོར་བཅས། །བསྒྲུབས་པས་གྲུབ་སྟེ་མཐུ་རྩལ་དཔག་ཏུ་མེད། །དྲག་ པོའི་ལས་གྲུབ་དགེ་སློང་ཡིན་ན་ཡང༌། །ལས་སུ་མཐུ་གཏད་སེར་བ་དག་ལ་བརྩོན། །གཡོ་རུ་ གཞུང་དུ་དགྲ་བོའི་མཁར་ཁྱིམ་ལ། །དགུན་དུས་གནམ་ལྕགས་ལན་གསུམ་བསྟུད་མར་ཕབ། ། ཡུལ་དཔོན་ལ་སོགས་གནོད་བྱེད་ཐམས་ཅད་སྟོངས། །འོན་ཀྱང་ནཻ་གུའི་འཕོ་བ་ཐེབས་ནས་ གཤེགས། །སེང་གེ་དཔལ་གྱི་བུ་གཉིས་བྱུང་བ་ནི། །འཇམ་དབྱངས་བློ་གྲོས་དང་ནི་འཇམ་

1-1-10

དབྱངས་བཟང༌། །འཇམ་དབྱངས་བཟང་པོས་ཆོས་རྗེ་བསོད་གྲགས་ལ། །སྦྱོར་དྲུག་ཞུས་ པས་ཉམས་རྟོགས་བཟང་པོ་སྐྱེས། །སྔ་མས་གཙང་གི་ཕུང་པོ་རི་བོ་ཆེར། །རྗོགས་ཆེན་ཡུན་ རིང་བསྒོམས་པའི་ལོ་རྒྱུས་སྣང༌། །དང་པོའི་སྲས་ནི་བདག་གི་བླ་མ་ཡིན། །མེས་པོའང་ཡིན་ ཏེ་རིག་སྔགས་འཆང་ཆེན་པོ། །མཚན་ནི་ཚུལ་ཁྲིམས་རྣམ་རྒྱལ་ཞེས་པ་ཡིན། །བྱིས་པའི་ དུས་ན་ཆོས་གྲགས་རྒྱ་མཚོའི་དྲུང༌། །ཡིག་དྲུག་བཟླས་ལུང་ཙམ་ཞིག་གསན་ཞེས་གསུང༌། ། ཆོས་རྗེ་འཕྲིན་ལས་པ་ལ་ཕར་ཚད་བསླབས། །རླུང་སེམས་དབྱེར་མེད་ལ་སོགས་ཆོས་ འགའ་ཞུས། །དབུས་སྨྱོན་པ་དང་པདྨ་གླིང་པ་དང༌། །ཟུར་དབོན་པ་དང་སོ་སྟོན་ཀུན་གཞོན་ སོགས། །སྔ་ཕྱིར་ཕྱག་རྫོགས་བླ་མ་མང་པོ་བསྟེན། །རྙིང་མའི་ཕྱོགས་ལ་མཁྱེན་པ་ཤིན་ཏུ་ཆེ། ། འཇིགས་བྱེད་ལ་སོགས་གཤེད་སྐོར་རྣམས་དང་ནི། །སྟོད་འབྲུག་སྐོར་དང་ངན་སོང་སྦྱོང་ རྒྱུད་སོགས། །གསར་མའང་མཁྱེན་ཅིང་སྐར་རྩིས་སྨན་དཔྱད་དང༌། །རྟེན་འབྲེལ་ཕྲ་མོ་སྣ་ ཚོགས་མང་དུ་མཁྱེན། །རྡོ་རྗེ་འཇིགས་བྱེད་ཕྱག་ན་རྡོ་རྗེ་དང༌། །མ་ནིང་ནག་པོ་བསྒྲུབས་པས་ རྟགས་ཀྱང་ཐོན། །སྔ་ཕྱིའི་ཡུལ་ལྷ་བྲན་དུ་འཁོལ་བར་མཛད། །མཁྱེན་བརྩེ་ནུས་མཐུ་གསུམ་ ཀ་མངའ་བའི་ཕྱིར། །འགྲོ་བ་རྣམས་ལ་ཕན་པ་རྒྱ་ཆེར་མཛད། །གང་འདིའི་དྲིན་ལས་བདག་ གི་ཕ་ཡིས་ཀྱང༌། །ཐོག་སེར་ལ་སོགས་ནུས་པ་འགའ་རེ་ཐོན། །དེ་དག་རྫུན་མེད་བཤུལ་ནི་ད་ ལྟའང་ཡོད། །དེ་ལྟར་ཁོ་བོའི་རུས་པའི་བྱུང་ཁུངས་ནི། །རྭ་ལོའི་རིགས་ལས་བྱུང་བ་ཡིན་ཞེས་ གླེང༌། །ངེད་ཀྱི་ཕ་མེས་བརྒྱུད་འདི་ཆོས་ནས་གཞལ་ན་ལོ་ཙཱ་བ་ཆེན་པོ་དང་ཆོས་མཁས་པ་ དང་མཐུ་བོ་ཆེའི་བརྒྱུད་པ་དེ་ཡིན། འཇིག་རྟེན་གྱི་དཔལ་འབྱོར་ནི། རྭ་ལོ་ཆེན་པོ་ཆོས་རྒྱལ་ ཁྲི་རལ་དང་འདྲ་བར་གྲགས་པ་དེ་ལགས། དེ་རྗེས་རྭ་ལོ་འབུམ་སེང་དང་ཤེར་རྒྱལ་ཡན་ཆད་ ཀྱང་འཕྲིན་ལས་དཔག་ཏུ་མེད། དཔེར་ན་བླ་ཆེན་འཕགས་པས་ལྡོང་སྟོན་དང་རོང་པ་རྒ་ལོ་ གཉིས་རྭའི་བུ་ཆེན་སློབ་བརྒྱུད་ཡིན་པ་དེ་བླ་མར་ཁུར་བ་ལྟ་བུ་ཡིན། བོད་ཀྱི་བླ་མ་བཟང་