• Division

    All Divisions

    yana

    chakra

  • Home
  • གྷ་རུང་པ་ལྷའི་རྒྱལ་མཚན་གྱི་གསུང་འབུམ། Works of Gharungpa Lhahi Gyaltsen 噶惹巴·拉沃蔣慈大師全集
  • ༼ཀ༽
  • དཀར་ཆག

1-1-1

གྷ་རུང་པ་ལྷའི་རྒྱལ་མཚན་གྱི་གསུང་འབུམ། ༼པོད་དང་པོའོ། །༽

1-1-2

དཀར་ཆག ཐོག་མའི་གླེང་བརྗོད། .........................................................................................(1) གྷ་རུང་པ་ལྷའི་རྒྱལ་མཚན་གྱི་རྣམ་ཐར་ཉུང་བསྡུས། ........................................................(1) ༄༅། །ཐེག་པ་ཆེན་པོ་རྒྱུད་བླ་མའི་བསྟན་བཅོས་ཀྱི་རྣམ་པར་ བཤད་པ་དེ་ཉིད་སྣང་བ་ཞེས་བྱ་བ་བཞུགས་སོ། །.......................................................(65) ༄༅། །བསྟན་པ་སྤྱི་འགྲེལ་གྱི་འགྲེལ་བཤད་རྒྱས་པར་བཞུགས། ......................................(1) ཆོས་དབྱིངས་གསལ་སྒྲོན་ཞེས་ཀྱང་བྱ་གྲུབ་མཐའི་ཤན་འབྱེད་ ཞེས་བྱ་བ་བཞུགས་སོ། །...........................................................(1) ངེས་དོན་གྱི་ཆོས་ལ་བསྐུལ་བ་ནམ་མཁའི་ནོར་བུ་ ཞེས་བྱ་བ་བཞུགས་སོ། །.........................................................(83) ངེས་དོན་ལ་བསྐུལ་བ་ནམ་མཁའི་ནོར་བུའི་སྐབས་སུ་འདེབས་རྒྱུའི་ ལུང་བསྡུས་ཞེས་བྱ་བ། ..........................................................(98) ༄༅། །ཟབ་ལམ་སྦྱོར་བ་ཡན་ལག་དྲུག་པའི་ཁྲིད་ཡིག་ཐར་ལམ་ གསལ་བྱེད་ཅེས་བྱ་བ་བཞུགས་སོ། །.........................................................(251) ཟབ་ལམ་རྡོ་རྗེ་རྣལ་འབྱོར་གྱི་བར་དུ་དགེ་བའི་ ཁྲིད་ཡིག་བཞུགས་སོ། །................................................................................(291) ཟབ་ལམ་རྡོ་རྗེ་རྣལ་འབྱོར་གྱི་ཐ་མར་དགེ་བའི་ ཁྲིད་ཡིག་བཞུགས་སོ། །................................................................................(312) ༄༅། །ཀུན་མཁྱེན་དོལ་པོ་པའི་རྣམ་ཐར་རྒྱས་པ་ལས་སླར་ཡང་ བསྡུས་པ་ལྷའི་རྒྱལ་མཚན་གྱིས་བཀོད་པའི་

1-1-3

དབུ་ཕྱོགས་ལེགས་སོ། །...........................................................(343) ཁྲོ་རྒྱལ་རྡོ་རྗེ་ཤུགས་ཀྱི་བསྐང་བའི་དབུ་ཕྱོགས་བཞུགས་སོ། །.....................(343) པར་བྱང་སྨོན་ཚིག..................................................................(351)

1-1-4

༄༅། །ཐེག་པ་ཆེན་པོ་རྒྱུད་བླ་མའི་བསྟན་བཅོས་ཀྱི་རྣམ་པར་ བཤད་པ་དེ་ཉིད་སྣང་བ་ཞེས་བྱ་བ་ བཞུགས་སོ། ། ༄༅། །ན་མོ་བུདྡྷཱ་ཡ། དབུ་མ་ཆེན་པོ་རྒྱུད་བླ་མའི་རྣམ་བཤད་དེ་ཉིད་སྣང་བ་ཞེས་བྱ་བ། བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། དོན་གཉིས་མཐར་ཐུག་སྟོན་མཆོག་རྫོགས་པའི་སངས་རྒྱས་དང༌། ། བདེན་གཉིས་ཟུང་འཇུག་ཆགས་བྲལ་ལམ་མཆོག་དམ་པའི་ཆོས། ། རིག་གྲོལ་ཕུན་ཚོགས་ཕྱིར་མི་ལྡོག་པའི་དགེ་འདུན་ཏེ། ། འཐོབ་བྱ་བླ་མེད་དཀོན་མཆོག་གསུམ་ལ་ཕྱག་འཚལ་ལོ། ། རྟོགས་བྱ་ཆོས་དབྱིངས་དྲི་མ་ཀུན་གྱིས་དག་བྱས་ནས། ། རྟོགས་པའི་ངོ་བོ་བྱང་ཆུབ་ཆེན་པོ་མྱུར་ཐོབ་སྟེ། ། དེ་ལྡན་བྲལ་དང་རྣམ་སྨིན་ཡོན་ཏན་རབ་རྒྱས་ནས། ། ཐོགས་མེད་ཕྲིན་ལས་འགྲོ་བ་ཀུན་ལ་འཇུག་གྱུར་ཅིག ། ཆོས་འཁོར་མཐར་ཐུག་འཁོར་ལོ་གསུམ་པ་ཡི། ། དགོངས་པ་མཐར་ཐུག་དབུ་མ་ཆེན་པོའི་དོན། ། སྟོན་བྱེད་མཐར་ཐུག་བླ་མའི་རྒྱུད་འདི་ནི། །

1-1-5

ལུང་རིགས་མཐར་ཐུག་རྣམས་ཀྱིས་གསལ་བར་བྱ། ། འདིར་ཐེག་པ་ཆེན་པོ་རྒྱུད་བླ་མ་འཕགས་པ་ཐོགས་མེད་ཀྱི་འགྲེལ་པ་ལྟར་འཆད་པ་ལ་ དོན་རྣམ་པ་བཞི་སྟེ། དོན་དང་མཐུན་པའི་མཚན་གྱི་དོན། དོན་ཆེན་སྒྲུབ་པ་སྤྱིའི་ཕྱག དོན་ མཆོག་ལྡན་པའི་བསྟན་བཅོས་དངོས། དོན་དེ་ལེགས་པར་བསྒྱུར་བའི་ཚུལ་ལོ། ། དང་པོ་ལ་བཞི། མཚན་བསྒྱུར་བ་དང༌། བཤད་པ་དང༌། འདོགས་པའི་རྒྱུ་མཚན་དང༌། བཏགས་པའི་དགོས་པའོ། ། དང་པོ་ནི་རྒྱ་གར་ནི་འཕགས་པའི་ཡུལ་སྐད་དུ་ནི་ཡུལ་དེ་པ་རྣམས་ཀྱི་སྐད་ལ་ཞེས་པའོ། ། བོད་ནི་ཁ་བ་ཅན་ཏེ་དེ་རྣམས་ཀྱི་སྐད་དུ་རིམ་པར་བསྒྱུར་ན། མ་ཧཱ་ནི་ཆེན་པོ་ཡ་ན་ནི་ཐེག་ པ་ཨུད་ཏ་ར་ནི་བླ་མ་ཏནྟྲ་ནི་རྒྱུད་ཤསྟྲ་ནི་བསྟན་བཅོས་སོ། ། གཉིས་པ་ལ་གསུམ་སྟེ། ཐེག་པ་ཆེན་པོ་ནི་ཆེན་པོ་བདུན་དང་ལྡན་པ་སྟེ། མདོ་སྡེ་རྒྱན་དུ། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དག་དང༌། །ཡེ་ཤེས་བརྩོན་འགྲུས་ རྩོམ་པ་དང༌། །ཐབས་ལ་མཁས་པར་གྱུར་པ་དང༌། །ཡང་དག་སྒྲུབ་པ་ཆེན་པོ་དང༌། །སངས་ རྒྱས་ཕྲིན་ལས་ཆེན་པོ་སྟེ། །ཆེན་པོ་འདི་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་ བརྗོད། །ཅེས་སོ། ། གཉིས་པ་རྒྱུད་བླ་མ་ནི། བརྗོད་བྱ་དང་རྗོད་བྱེད་མཐར་ཐུག་བླ་ན་མེད་པའི་ཕྱིར་ཏེ། བརྗོད་པར་བྱ་བ་ཆོས་དབྱིངས་རྒྱུན་ཆགས་པའམ་བར་མ་ཆད་པས་རྒྱུད་དེ། སེམས་ཅན་དང་ བྱང་ཆུབ་སེམས་དཔའ་དང་སངས་རྒྱས་ཀྱི་གནས་སྐབས་ཐམས་ཅད་དུ་སྟོབས་སོགས་ཅན་ གྱི་བདེ་བཤེགས་སྙིང་པོ་རྒྱུན་ཆགས་སུ་ཡོད་པས་སོ། །མ་དག་མ་དག་དག་པ་དང༌། །ཤིན་ཏུ་ རྣམ་དག་གོ་རིམ་བཞིན། །ཞེས་དང༌། རྡོ་རྗེ་རྩེ་མོར། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་ བ་རྒྱུད་དུ་བརྗོད་པར་བྱ། །ཕྱི་མ་ཞེས་བྱ་ཕ་རོལ་ཏེ། །མྱ་ངན་འདས་པ་རྒྱུད་ཕྱི་མ། །ཞེས་སོ།

1-1-6

། རྗོད་པར་བྱེད་པ་བླ་ན་མེད་པ་ཡང་ཡིན་ཏེ་བཀའ་འཁོར་ལོ་གསུམ་པོ་དམན་པ་དང་མཆོག་ གི་རིམ་པས་ཕྱི་མ་ཕྱི་མ་མཆོག་གིས་ན་འཁོར་ལོ་གསུམ་པ་ནི་རྒྱུད་ཕྱི་མ་དང་བླ་མ་དང་དབུ་ མ་ཆེན་པོ་སྣང་བཅས་དབུ་མའི་གཞུང་སྟེ་འདིར་སླར་ཡང་བླ་མའི་རྒྱུད་འདིར་ནི་ཞེས་སོགས་ དང༌། མྱང་འདས་ཆེན་པོར། ད་ནི་སྨན་ཆེན་པོ་བཞིན་དུ་དེ་བཞིན་གཤེགས་པའི་གསུང་རབ་ དགུ་ལས་དོན་གྱི་བྱ་བ་བྱས་ཟིན་པའི་དགེ་སློང་རྣམས་ལ་དེ་བཞིན་གཤེགས་པའི་སྙིང་པོའི་ རྒྱུད་ཕྱི་མ་ལས་དེ་བཞིན་བཤེགས་པའི་སྙིང་པོ་རྟག་གོ །ཞེས་སྟོན་པར་མཛད་དོ་ཞེས་དང༌། འོ་མ་ལས་ཞོ་དང་ཞོ་ལས་མར་གསར་དང་མར་གསར་ལས་ཞུན་མར་དང༌། ཞུན་མར་ལས་ མར་གྱི་ཉིང་ཁུ་འབྱུང་ངོ༌། །དེ་བཞིན་དུ་མདོ་སྡེ་བཅུ་གཉིས་ལས་མདོའི་སྡེ་དང་མདོའི་སྡེ་ལས་ ཤིན་ཏུ་རྒྱས་པའི་སྡེ་དང་ཤིན་ཏུ་རྒྱས་པའི་སྡེ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཤེས་ རབ་ཀྱི་ཕ་རོལ་ཏུ་ཕྱིན་པ་ལས་ཡོངས་སུ་མྱ་ངན་ལས་འདས་པ་མར་གྱི་ཉིང་ཁུ་ལྟ་བུའི་མདོ་ སྡེ་འབྱུང་ངོ་ཞེས་སོ༑ ༑འོ་ན་བཀའ་བར་པ་དབུ་མ་དང་ཐ་མ་སེམས་ཙམ་དུ་གྲག་གོ་ཞེ་ན། དེ་ ནི་ཨར་འཁྱམས་ཀྱི་སྨྲ་བ་སྟེ། དེའང་དབུ་སེམས་ཀྱི་ཁྱད་མདོས་སྤྱིར་བསྟན་པ་དང༌། རྒྱུད་ དང་བསྟན་བཅོས་ཀྱིས་ཁྱད་པར་དུ་བཤད་པས་ཤེས་ཏེ་དང་པོ་ནི། གང་ཕྱིར་རྒྱལ་ལས་ཆེས་ མཁས་འགའ་ཡང་འཇིག་རྟེན་འདི་ན་ཡོད་མིན་ཏེ་ཞེས་སོགས་ཀྱི་ཕྱིར་སྟོན་པ་ཉིད་དཔང་ དུ་ཆེ་ལ་དེ་ཉིད་ཀྱིས་བར་བ་གནས་སྐབས་སྣང་མེད་ཀྱི་དབུ་མ་དང་ཐ་མ་མཐར་ཐུག་སྣང་ བཅས་ཀྱི་དབུ་མར་གསུངས་པས་སོ། །དེའང་ལང་གཤེགས་སུ༑ སེམས་ཙམ་ལ་ནི་བརྟེན་ ནས་ནི། །ཕྱི་རོལ་དོན་དུ་མི་རྟོག་གོ །སྣང་བ་མེད་པ་ལ་བརྟེན་ནས། །སེམས་ཙམ་ལས་ནི་ འདའ་བར་བྱ། །ཡང་དག་དམིགས་པ་ལ་བརྟེན་ནས། །སྣང་བ་མེད་ལས་འདའ་བར་བྱ། ། སྣང་མེད་གནས་པའི་རྣལ་འབྱོར་པས། །ཐེག་པ་ཆེན་པོ་མི་མཐོང་ངོ༌། །ཞེས་ཏེ་བར་བ་ནི་ སེམས་ཙམ་མན་དངོས་པོར་སྨྲ་བའི་གཉེན་པོར་ཤེས་བྱ་ཐམས་ཅད་རྣམ་ཀུན་སྟོང་པར་སྟོན་

1-1-7

གྱི་གཤིས་ལ་རང་གི་ངོ་བོས་མི་སྟོང་པའི་བདེ་གཤེགས་སྙིང་པོ་ཆོས་སྐུ་ཡོད་པར་མི་སྟོན་པས་ སྣང་མེད་བར་བ་ལ་གནས་ཙམ་གྱི་ཐེག་ཆེན་རྫོགས་པར་མི་མཐོང་སྟེ་ཐེག་ཆེན་མཐར་ཐུག་ ནི་བདེ་གཤེགས་སྙིང་པོ་ཡིན་པས་སོ། །མྱང་འདས་ཆེན་པོར། མདོ་སྡེ་ཐམས་ཅད་དང་ཏིང་ངེ་ འཛིན་ཐམས་ཅད་ཐོས་པས་ནི་དེ་བཞིན་གཤེགས་པའི་སྙིང་པོ་ཡོད་པར་མི་ཤེས་སོ། །དབྱར་ གྱི་ནམ་ལ་ཤ་མོ་སྐྱེ་བ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདི་ལས་ དགོངས་པའི་ཚིག་གསང་བ་ཐམས་ཅད་འབྱུང་སྟེ། འདི་ཐོས་མ་ཐག་ཏུ་སེམས་ཅན་ཐམས་ ཅད་ལ་དེ་བཞིན་གཤེགས་པའི་སྙིང་པོ་ཡོད་པར་ཡང་དག་པར་ཤེས་པར་འགྱུར་རོ་ཞེས་དང༌། འདིར་ཡང༌། འདི་ལྟར་དེ་ནི་མ་ཐོས་པས་ཞེས་སོགས་དང༌། འདི་ལས་དེ་ནི་ཐོས་པ་ལས་ཞེས་ སོགས་ཀྱི་ཕྱིར་རོ། །དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོར་ཡང་ནོར་ བུ་མཁན་གྱི་ནོར་བུའི་དྲི་མ་རགས་པ་དང་འབྲིང་དང་ཕྲ་བ་རིམ་པར་སྦྱོང་བ་བཞིན་སྟོན་པས། དེ་བཞིན་གཤེགས་པའི་སྙིང་པོའི་དྲི་མ་རགས་པ་དང་འབྲིང་དང་ཕྲ་བ་རྣམས་སྦྱོང་བའི་དོན་ དུ་འཁོར་ལོ་དང་པོ་དང་གཉིས་པ་དང་གསུམ་པ་རྣམས་རིམ་པར་བསྐོར་བར་གསུངས་པས་ སོ། །གལ་ཏེ་ཆོས་འཁོར་གཉིས་པས་གསུམ་པ་དམན་ན་སྒོམ་སྤང་འབྲིང་པོའི་གཉེན་པོ་སྒོམ་ ལམ་འབྲིང་པོ་བས་སྒོམ་སྤང་ཆུ་ངུའི་གཉེན་པོ་སྒོམ་ལམ་ཆེན་པོ་དམན་པར་ཐལ་ཏེ་དེ་ལྟར་ ཡང་མིན་ནོ༑ ༑དེ་ཉིད་དུ། རིགས་ཀྱི་བུ་འདི་ལྟ་སྟེ་དཔེར་ན་ནོར་བུ་མཁན་མཁས་པ་ནོར་བུ་ སྦྱོང་བའི་ཚུལ་ལེགས་པར་ཤེས་པ་དེས། ནོར་བུའི་རིགས་ནས་ཡོངས་སུ་མ་དག་པའི་ནོར་བུ་ རིན་པོ་ཆེ་བླངས་ཏེ་ལན་ཚྭའི་ཆུ་རྣོན་པོས་སྦངས་ནས་སྐྲའི་རེ་བས་ཡོངས་སུ་སྦྱོང་བས་ཡོངས་ སུ་སྦྱོང་བར་བྱེད་དོ། །དེ་ཙམ་གྱིས་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་ཟས་ཀྱི་ཁུ་ བ་རྣོན་པོས་སྦངས་ནས་བལ་གྱི་ལྭ་བའི་ཡོངས་སུ་སྦྱོང་བས་ཡོངས་སུ་སྦྱོང་བར་བྱེད་དོ། །དེ་ ཙམ་གྱིས་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་སྨན་ཆེན་པོའི་ཁུ་བ་ལ་སྦངས་ནས་

1-1-8

རས་སྲབ་མོའི་ཡོངས་སུ་སྦྱོང་བས་ཡོངས་སུ་སྦྱོང་བར་བྱེད་དོ། །ཡོངས་སུ་སྦྱངས་ཏེ་དྲི་མ་དང་ བྲལ་བ་ནི་བཻ་ཌཱུརྱའི་རིགས་ཆེན་པོ་ཞེས་བརྗོད་དོ། ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་ཡོངས་སུ་མ་དག་པའི་སེམས་ཅན་ གྱི་ཁམས་མཁྱེན་ནས་མི་རྟག་པ་དང་སྡུག་བསྔལ་བ་དང་བདག་མེད་པ་དང་མི་གཙང་བ་ དང་ཡིད་འབྱུང་བའི་གཏམ་གྱིས་འཁོར་བ་ལ་དགའ་བའི་སེམས་ཅན་རྣམས་སྐྱོ་བ་བསྐྱེད་ པར་མཛད་དེ་འཕགས་པའི་ཆོས་འདུལ་བ་ལ་འཛུད་པར་མཛད་དོ། །དེ་ཙམ་གྱིས་དེ་བཞིན་ གཤེགས་པ་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་སྟོང་བ་ཉིད་དང་མཚན་མ་ མེད་པ་དང་སྨོན་པ་མེད་པའི་གཏམ་གྱིས་དེ་བཞིན་གཤེགས་པའི་ཚུལ་རྟོགས་པར་མཛད་ དོ། །དེ་ཙམ་གྱིས་དེ་བཞིན་གཤེགས་པ་བརྩོན་པ་འདོར་བ་ཡང་མིན་ཏེ་དེའི་འོག་ཏུ་ཕྱིར་ མི་ལྡོག་པའི་ཆོས་ཀྱི་འཁོར་ལོའི་གཏམ་འཁོར་གསུམ་ཡོངས་སུ་དག་པའི་གཏམ་གྱིས་རང་ བཞིན་སྣ་ཚོགས་ཀྱི་རྒྱུ་ཅན་གྱི་སེམས་ཅན་དེ་རྣམས་དེ་བཞིན་གཤེགས་པའི་ཡུལ་ལ་འཇུག་ པར་མཛད་དོ། །ཞུགས་པར་གྱུར་ཅིང་དེ་བཞིན་གཤེགས་པའི་ཆོས་ཉིད་རྟོགས་ན་ནི་བླ་ན་ མེད་པའི་ཡོན་གནས་ཞེས་བརྗོད་དོ་ཞེས་སོ། །སྟོན་པའི་མདོ་རྣམས་ཀྱི་རང་འགྲེལ་མདོ་སྡེ་ དགོངས་པ་ངེས་འགྲེལ་དུ། བཅོམ་ལྡན་འདས་ཀྱིས་ཡུལ་ཝ་ར་ན་སི་དྲང་སྲོང་སྨྲ་བ་རི་དྭགས་ ཀྱི་གནས་སུ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་འཕགས་པའི་བདེན་ པ་བཞི་རྣམ་པར་བསྟན་པའི་ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་སྔོན་ལྷར་གྱུར་པའམ་ མིར་གྱུར་པ་སུས་ཀྱང་ཆོས་དང་མཐུན་པར་མ་བསྐོར་བ་ཅིག་རབ་ཏུ་བསྐོར་ཏེ། བཅོམ་ལྡན་ འདས་ཀྱིས་ཆོས་ཀྱི་འཁོར་ལོ་བསྐོར་བ་དེ་ཡང་བླ་ན་མཆིས་པ་སྐབས་མཆིས་པ་དྲང་བའི་ དོན་རྩོད་པའི་གཞིའི་གནས་སུ་གྱུར་པ་ལགས་ལ། བཅོམ་ལྡན་འདས་ཀྱིས་ཆོས་རྣམས་ངོ་ བོ་ཉིད་མ་མཆིས་པ་ཉིད་ལས་བརྩམས་སྐྱེ་བ་མ་མཆིས་པ་དང་འགག་པ་མ་མཆིས་པ་དང་

1-1-9

གཟོད་མ་ནས་ཞི་བ་དང་རང་བཞིན་གྱིས་ཡོངས་སུ་མྱ་ངན་འདས་པ་ལས་བརྩམས་ནས་ཐེག་ པ་ཆེན་པོ་ལ་ཞུགས་པ་རྣམས་ལ་སྟོང་པ་ཉིད་སྨོས་པའི་རྣམ་པས་ཆེས་ངོ་མཚར་རྨད་དུ་བྱུང་ བའི་ཆོས་ཀྱི་འཁོར་ལོ་གཉིས་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་ བ་དེ་ཡང་བླ་ན་མཆིས་པ་སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་པ་ ལགས་ཀྱི། བཅོམ་ལྡན་འདས་ཀྱིས་ཆོས་རྣམས་ངོ་བོ་ཉིད་མ་མཆིས་པ་ཉིད་ལས་བརྩམས་ སྐྱེ་བ་མ་མཆིས་པ་ཉིད་དང་འགག་པ་མ་མཆིས་ཉིད་དང་གཟོད་མ་ནས་ཞི་བ་ཉིད་དང་རང་ བཞིན་གྱིས་མྱ་ངན་ལས་འདས་པ་ཉིད་ལས་བརྩམས་ནས་ཐེག་པ་ཐམས་ཅད་ལ་ཡང་དག་ པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པ་ཤིན་ཏུ་ངོ་མཚར་རྨད་དུ་བྱུང་ བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་ བ་འདི་ནི་བླ་ན་མ་མཆིས་པ་སྐབས་མ་མཆིས་པ་ངེས་པའི་དོན་ལགས་ཏེ་རྩོད་པའི་གཞིའི་ གནས་སུ་གྱུར་པ་མ་ལགས་སོ། །བཅོམ་ལྡན་འདས་ཆོས་རྣམས་ཀྱིས་ངོ་བོ་ཉིད་མ་མཆིས་པ་ ཉིད་ལས་བརྩམས་རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ནས། བཅོམ་ལྡན་འདས་ཀྱིས་ངེས་པའི་དོན་བསྟན་པ་འདི་རིགས་ཀྱི་བུའམ་རིགས་ཀྱི་བུ་མོ་གང་ གིས་ཐོས་ནས་མོས་པར་བགྱིད་པ་དང་ཡི་གེ་འདྲིར་རྩོལ་བ་དང༌། ཡི་གེར་བྲིས་ནས་འཆང་ པ་དང་ཀློག་པ་དང་མཆོད་པ་དང་ཡང་དག་པར་འགྱིད་པ་དང༌། ལུང་ནོད་པ་དང་ཁ་དོན་ བགྱིད་པ་དང༌། སེམས་པ་དང་བསྒོམ་པའི་རྣམ་པར་སྦྱོར་བར་བགྱིད་པ་དེའི་བསོད་ནམས་ ཇི་ཙམ་ཞིག་བསྐྱེད་པར་འགྱུར་བ་ལགས་ཞེས་གསོལ་པ་དང༌། བཅོམ་ལྡན་འདས་ཀྱིས་དོན་ དམ་ཡང་དག་འཕགས་རིགས་ཀྱི་བུའམ་རིགས་ཀྱི་བུ་མོ་དེས་ནི་བསོད་ནམས་དཔག་ཏུ་མེད་ གྲངས་མེད་པ་བསྐྱེད་དོ༑ ༑དེའི་དཔེར་བྱ་བར་སླ་བ་མིན་གྱི་འོན་ཀྱང་མདོར་བསྡུས་ཏེ་ཁྱོད་ ལ་བཤད་པར་བྱའོ། །དོན་དམ་ཡང་དག་འཕགས་འདི་ལྟ་སྟེ་སེན་མོའི་རྩེ་ལ་གནས་པའི་

1-1-10

རྡུལ་གང་ཡིན་པ་དེ་དག་ནི་ས་ལ་གནས་པའི་རྡུལ་རྣམས་དང་བསྒྲུན་ན་བརྒྱའི་ཆར་ཡང་ཉེ་ བར་མི་འགྲོ་ཞིང༌། སྟོང་གི་ཆ་དང་འབུམ་གྱི་ཆ་དང་གྲངས་དང་ཆ་དང་བགྲང་བ་དང་དཔེ་དང་ རྒྱུར་ཡང་ཉེ་བར་མི་འགྲོའོ། །བ་ལང་གི་རྗེས་ཀྱི་ཆུ་ནི་རྒྱ་མཚོ་ཆེན་པོ་བཞིའི་ཆུ་དང་བསྒྲུན་ན་ བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་ཉེ་བར་མི་འགྲོའོ། །དོན་དམ་ཡང་ དག་འཕགས་དེ་བཞིན་དུ་ངས་དྲང་བའི་དོན་གྱི་མདོ་སྡེ་ལ་མོས་པ་ནས་བསྒོམ་པའི་རྣམ་པའི་ སྦྱོར་བར་བྱེད་པའི་བར་གྱི་བསོད་ནམས་གང་བཤད་པ་དེ་ནི་ངེས་པའི་དོན་བསྟན་པ་ལ་མོས་ པ་ནས་བསྒོམས་པའི་རྣམ་པས་སྦྱོར་བ་ལས་ཡང་དག་པར་འགྲུབ་པའི་བར་གྱི་བསོད་ནམས་ འདི་དང་བསྒྲུན་ན་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་ཉེ་བར་མི་འགྲོའོ་ ཞེས་འཁོར་ལོ་བར་པ་ལས་ཐ་མ་ཁྱད་པར་རྣམ་པ་དྲུག་གིས་འཕགས་ཏེ། བླ་ན་ཡོད་པ་དང་ མེད་པའི་དང༌། ལུང་རིགས་ཀྱིས་གནོད་པའི་གོ་སྐབས་ཡོད་པ་དང་མེད་པའི་དང༌། དྲང་དོན་ དང་ངེས་དོན་གྱི་དང༌། རྩོད་གཞི་ཡིན་པ་དང་མིན་པའི་དང༌། རྣམ་པར་ཕྱེ་ནས་ཡིན་ལུགས་ གསལ་བར་མི་སྟོན་པ་དང་སྟོན་པའི་དང༌། ཆོས་སྤྱོད་ཀྱི་བསོད་ནམས་སེན་མོའི་རྩེའི་རྡུལ་ དང་ས་གཞི་བྱིན་གྱི་རྡུལ་ལྟ་བུའི་ཁྱད་པར་དང་དྲུག་གསུངས་སོ། །བླ་མ་གོང་མ་དག་འཁོར་ ལོ་གསུམ་པོ་གྲངས་བཞིན་དུ་ལྷག་པ་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཀྱི་བསླབ་ པ་གསུམ་མམ་སྤྱོད་པ་དང་བསྒོམས་པ་དང་ལྟ་བ་གསུམ་རིམ་པར་སྟོན་པ་གཙོ་ཆེ་གསུང་བ་ མད་དེ། རྒྱུད་བླར། གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ཅིང༌། །ཁྲིམས་ཀྱིས་ མཐོ་རིས་བསྒོམས་པས་ཉོན་མོངས་སྤོང་བྱེད་ལ། །ཤེས་རབ་ཉོན་མོངས་ཤེས་བྱ་ཀུན་སྤོང་དེ་ ཡི་ཕྱིར། །འདི་མཆོག་ཉིད་དེ་དེ་ཡི་རྒྱུ་ནི་འདི་ཐོས་ཡིན། །ཞེས་ཏེ་འདི་ཐོས་ཞེས་པ་བཀའ་ཐ་ མ་འདི་ཞེས་པའོ། །གལ་ཏེ་བར་བའི་གདུལ་བྱ་ཐེག་ཆེན་པ་ཤ་སྟག་ཡིན་ལ་ཐ་མིའི་གདུལ་བྱ་ ནི་དེ་ལྟ་མིན་པར་མུ་སྟེགས་སོ་སྐྱེ་ཉན་རང་སོགས་སྣ་ཚོགས་ཡིན་པས་བར་པ་མཆོག་སྟེ་བར་