• Home
  • ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་གསུང་འབུམ། Works of Dolpopa 篤補巴·喜饒堅贊大師全集
  • རི་ཆོས་ངེས་དོན་རྒྱ་མཚོ་ཞེས་བྱ་བ་མཐར་ཐུག་ཐུན་མོང་མ་ཡིན་པའི་མན་ངག་བཞུགས།

1-1-10

༄༅། །རི་ཆོས་ངེས་དོན་རྒྱ་མཚོ་ཞེས་བྱ་བ་མཐར་ཐུག་ ཐུན་མོང་མ་ཡིན་པའི་མན་ངག་བཞུགས།

1-1-11

1-1-12

༄༅། །རི་ཆོས་ངེས་དོན་རྒྱ་མཚོ་ཞེས་བྱ་བ་མཐར་ཐུག་ ཐུན་མོང་མ་ཡིན་པའི་མན་ངག་བཞུགས། ༄༅༅། ། ༼བཤད་པ་ལ་འཇུག་པ།༽ ཨོཾ་གུ་རུ་བུད་དྷ་བོ་དྷི་སཏྭེ་བྷྱོ་ན་མོ་ན་མཿ(ཨོཾ་བླ་ མ་སངས་རྒྱས་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ་མཆོད་དོ་)རི་ཆོས་ངེས་དོན་རྒྱ་མཚོ་ ཞེས་བྱ་བ་མཐར་ཐུག་ཐུན་མོང་མ་ཡིན་པའི་མན་ངག(འགྲོ་བ་ཀུན་གྱི་)དཔལ་(དུ་གྱུར་པ་ གཉིས་མེད་ཡེ་ཤེས་)རྡོ་རྗེ་(མི་ཕྱེད་ཞེས་བྱར་བརྗོད་)སེམས་དཔའ་(སྲིད་པ་གསུམ་གཅིག་པ་)ལ་ ཕྱག་འཚལ་ལོ། །(གློ་བུར་)དྲི་མ་སྦྱང་བའི་གཞི་བདེ་གཤེགས་སྙིང་པོ་ལ་ཕྱག་འཚལ་ལོ། །(གློ་ བུར་)དྲི་མ་སྦྱོང་བའི་ལམ་རྡོ་རྗེའི་རྣལ་འབྱོར་ལ་ཕྱག་འཚལ་ལོ། །(གློ་བུར་)དྲི་མས་དག་པའི་ གཞི་བྲལ་འབྲས་ཆོས་སྐུ་ལ་ཕྱག་འཚལ་ལོ། །གང་གསུང་འོད་ཀྱི་ཆ་ཤས་ཕྲ་བས་ཀྱང༌། །སྙིང་ གི་མུན་སྟུག་དཔག་ཡས་རབ་བསལ་ནས། །ཡང་དག་རྫོགས་པའི་སྣང་བ་རྒྱས་མཛད་པ། །རྗེ་ བཙུན་བླ་མ་མཆོག་ལ་དང་བོར་འདུད། །གང་ཞིག་(ཀུན་རྫོབ་ཀྱི་)ཆོས་རྣམས་ཀུན་གྱིས་ དབེན་ཡང་ཟག་མེད་བགྲང་ཡས་(དོན་དམ་གྱི་)ཆོས་(རྣམས་)ཀྱི་སྐུ། །ཆོས་དང་གང་ཟག་ (གི་)བདག་དང་(གདོད་ནས་རང་བཞིན་གྱིས་)བྲལ་ཡང་དེ་བཞིན་ཉིད་བདག་དག་པའི་ བདག །ཡོད་མེད་རྟག་ཆད་མཐའ་ལས་འདས་ཀྱང་(དེ་དག་གི་དབུས་མའམ་བར་མ་སྐད་ཅིག་

1-1-13

ལས་འདས་པ་དོན་དམ་གྱི་དབྱིངས་ཡིན་པས་)རྟག་བརྟན་གཡུང་དྲུང་ཉིད་དུ་བཞུགས། །དངོས་ རྣམས་ཀུན་གྱི་རང་བཞིན་མེད་ཀྱང་རང་བཞིན་འོད་གསལ་ལ་བཏུད་ནས། །རང་ཁྱིམ་ས་ འོག་གཏེར་ཆེན་བཞིན་དུ་ཤེས་པར་བྱ་བ་གང་ཡིན་(པ་གཞི་)དང་། །དེ་ཐོབ་ཐབས་ལ་ བརྟོན་པ་བཞིན་དུ་ཉམས་སུ་བླང་བ་གང་ཡིན་(པ་ལམ་)དང༌། །དེ་ཐོབ་དོན་ཀུན་གྲུབ་པ་ བཞིན་དུ་ཐོབ་པར་བྱ་བ་གང་ཡིན་(པ་འབྲས་བུ་)རྣམས། །ལྷ་མིག་ལྡན་པས་སྟོན་པ་བཞིན་དུ་ རྣམ་དག་ལུང་བཞིན་བསྟན་བྱ་ཞིང༌། །རྒྱལ་བའི་ས་བོན་བཟང་པོ་(རྒྱས་པའི་རིགས་སད་ པ་)ལས་བྱུང་བསོད་ནམས་ཚོགས་ལས་གང་འཁྲུངས་པ། །རྣམ་སྨིན་འབྲས་བུའི་(མཚན་དཔེ་ ལ་སོགས་པ་)ཡོན་ཏན་དང་ལྡན་གཟུགས་ཀྱི་སྐུ་ལའང་ཕྱག་འཚལ་ནས། །འབྲས་མཆོག་ ལྷགས་པའི་ཤིང་ཆེན་སྐྱེད་བཞིན་དྲང་སྲོང་(ཆེན་པོ་)རྣམས་ཀྱི་བརྡ་ཡི་སྐུ། །(རྒྱུ་)གང་གིས་ (ཚུལ་)ཇི་ལྟར་སྐྱེད་པ་དེ་ཡང་ལུང་ལས་བྱུང་བཞིན་བྲི་བར་བྱ། (འདི་དག་ལ་སོགས་པ་སྐབས་ ཐམས་ཅད་དུ་ཡོད་པ་ལ་མཐར་ལྷུང་མ་ལྷུང་གཉིས་དང་མེད་པ་ལ་མཐར་ལྷུང་མ་ལྷུང་གཉིས་དང་རྟག་ པ་ལ་མཐར་ལྷུང་མ་ལྷུང་གཉིས་དང་ཆ་པ་ལ་མཐར་ལྷུང་མ་ལྷུང་གཉིས་ལ་སོགས་པར་འབྱེད་པའི་ མན་ངག་ཟབ་མོ་དྲན་པར་བྱའོ།།) ༈ ༼ངེས་དོན་གྱི་གཞི་ལམ་འབྲས་བུ་བསྡུས་ནས་བསྟན་པ།༽ འདིར་ཐར་པའི་ མཆོག་རང་བཞིན་འོད་གསལ་ཆོས་ཀྱི་སྐུ་རང་བྱུང་གི་ཡེ་ཤེས་གཙང་བདག་བདེ་དང་རྟག་ པའི་མཐར་ཐུག་པ་གང་ཡིན་པ་(མཁའ་ཁྱབ་ཏུ་ནམ་ཡང་བཞུགས་པ་)དེ་ཐོབ་ནས་གཟུགས་ཀྱི་ སྐུས་སེམས་ཅན་ཐམས་ཅད་ཀྱི་དོན་བྱ་བར་འདོད་པ་དག་གིས་དང་པོ་ཉིད་དུ་ཤེས་པར་ བྱ་བ་ནི་དབུལ་པོའི་ཁྱིམ་གྱི་ས་འོག་ན་རིན་པོ་ཆའི་གཏེར་ཆེན་པོ་ཡོད་ཀྱང་མི་བདུན་སྲིད་

1-1-14

ཀྱི་ས་རྡོས་བསྒྲིབས་ནས་མ་མཐོང་ཞིང་མ་རྟོགས་ལ་མ་ཐོབ་པས་སྡུག་བསྔལ་བ་ཉིད་དུ་ གནས་པ་ཇི་ལྟ་བ་དེ་བཞིན་དུ་འོད་གསལ་ཆོས་སྐུའི་ཡོན་ཏན་གྱི་གཏེར་ཆེན་པོ་རང་ གཞན་ཐམས་ཅད་ལ་དུས་ཐམས་ཅད་དུ་(ནམ་མཁའ་ལྟར་ཁྱབ་པར་)ཡོད་ཀྱང་གློ་བུར་དྲི་ མས་བསྒྲིབས་ནས་མ་མཐོང་ཞིང་མ་རྟོགས་ལ་མ་ཐོབ་པས་རྟག་ཏུ་སྡུག་བསྔལ་བ་ཉིད་དུ་ གནས་པ་གང་ཡིན་པ་སྟེ། དེ་ནི་བླ་མ་དམ་པའི་མན་ངག་ཁྱད་པར་ཅན་དང་ལྡན་པའི་ ལུང་དང་རིགས་པ་དྲི་མ་མེད་པ་དག་ལས་(གནས་ལུགས་སྙིང་པོ་ནི་)ཐོབ་པར་བྱ་བ་ཉིད་དང་ (འཁྲུལ་ལུགས་དྲི་མ་ནི་)སྤང་བར་བྱ་བ་ཉིད་དུ་ལེགས་པར་ཁོང་དུ་ཆུད་པར་བྱ་བའོ། །འདི་ནི་ ལྷའི་མིག་དང་ལྡན་པ་དག་གིས་གཏེར་དེ་ལེགས་པར་བསྟན་པ་ལས་གཏེར་ཆེན་པོ་ཉིད་ནི་ ཐོབ་པར་བྱ་བ་དང་དེ་ལ་གཡོགས་པའི་ས་རྡོ་རྣམས་ནི་དོར་བར་བྱ་བ་ཉིད་དུ་ཤེས་པ་དང་ མཚུངས་ཏེ། (སྒྲིབ་གཡོགས་)དེ་མ་བསལ་ན་(གཏེར་)དེ་མི་འཐོབ་པ་དང༌། (སྒྲིབ་གཡོགས་)དེ་ བསལ་བ་ཙམ་གྱིས་(གཏེར་)དེ་འཐོབ་པར་ཤེས་པ་དང་ཡང་ཆོས་མཚུངས་སོ། །དེ་ལྟར་ཁོང་ དུ་ཆུད་ནས་ཉམས་སུ་བླང་བར་བྱ་བ་ནི་གློ་བུར་དྲི་མ་མཐའ་དག་བསལ་བའི་ཆེད་དུ་རྣམ་ པར་དག་པའི་ཡེ་ཤེས་ཀྱི་ཚོགས་འཁོར་དང་བཅས་པ་བསྒྲུབ་པ་ལ་བརྩོན་པ་གང་ཡིན་པ་ སྟེ། འདི་ནི་མི་བདུན་སྲིད་ཀྱི་ས་རྡོ་དེ་རྣམས་སེལ་བར་བྱེད་པ་དང་མཚུངས་སོ། །དེ་ལྟར་ ཉམས་སུ་བླངས་པ་ལས་ཐོབ་པ་ནི་བྲལ་འབྲས་ཆོས་ཀྱི་སྐུ་ཟག་པ་མེད་ཅིང་(དོན་དམ་ དང་)མི་འབྲལ་བ(ངོ་བོ་གཅིག་པ)འི་ཡོན་ཏན་གྱི་གཏེར་ཆེན་པོ་ཐོབ་པ་གང་ཡིན་པ་སྟེ། འདི་ ནི་རིན་པོ་ཆེའི་གཏེར་དེ་ཉིད་ལེགས་པར་ཐོབ་པ་དང་མཚུངས་སོ། ། ༈ ༼དེ་རྣམས་ལུང་གིས་གྲུབ་ཚུལ་བསྡུས་ནས་བསྟན་པ།༽ འདིར་དེ་དག་དེ་ལྟར་

1-1-15

ཡིན་པར་གང་ལས་ཤེས་ཞེ་ན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ལེགས་ པར་གསུངས་པ་ལས་ཤེས་ཏེ། ཇི་སྐད་དུ། དེ་བཞིན་གཤེགས་པའི་སྙིང་པོའི་མདོར་རིགས་ ཀྱི་བུ་དག་གཞན་ཡང་འདི་ལྟ་སྟེ། དཔེར་ན་དབུལ་པོ་ཞིག་གི་ཁྱིམ་གྱི་ནང་གི་མཛོད་ཀྱི་ འོག་གི་ས་ལ་གཏེར་ཆེན་པོ་དབྱིག་དང་གསེར་གྱིས་གང་བ་མཛོད་ཀྱི་ཚད་ཙམ་ཞིག་མི་ བདུན་སྲིད་ཀྱི་སས་ཡོག་པའི་འོག་ན་ཡོད་ལ། གཏེར་ཆེན་པོ་དེས་མི་དབུལ་པོ་དེ་ལ་འདི་ སྐད་དུ། ཀྱེ་མི་ང་ནི་གཏེར་ཆེན་པོ་སྟེ་སས་ཡོག་ཅིང་འདུག་གོ་ཞེས་མི་སྨྲ་སྟེ། འདི་ལྟ་སྟེ། གཏེར་ཆེན་པོ་ནི་སེམས་ཀྱི་ངོ་བོ་(ཅན་)ཉིད་ཀྱིས་སེམས་ཅན་མ་ཡིན་(པས་སྨྲ་མི་ཤེས་)པའོ། ། མི་དབུལ་པོའི་ཁྱིམ་གྱི་བདག་པོ་དེ་ནི་དབུལ་བའི་སེམས་ཀྱིས་རྗེས་སུ་སེམས་ཤིང་ (གཏེར་)དེ་ཉིད་ཀྱི་སྟེང་ན་རྣམ་པར་རྒྱུ་ཡང་སའི་འོག་ན་གཏེར་ཆེན་པོ་ཡོད་པ་དེ་མ་ཐོས་ མི་ཤེས་མ་མཐོང་ངོ༌། །རིགས་ཀྱི་བུ་དག་དེ་བཞིན་དུ་སེམས་ཅན་ཐམས་ཅད་ཀྱི་མངོན་པར་ ཞེན་པའི་ཡིད་ལ་བྱེད་པ་ཁྱིམ་ལྟ་བུར་གྱུར་པའི་འོག་ན་དེ་བཞིན་གཤེགས་པའི་སྙིང་པོ་ (དོན་དམ་ཆོས་ཉིད་ཀྱི་)སྟོབས་དང་མི་འཇིགས་པ་དང་(སངས་རྒྱས་ཀྱི་ཆོས་)མ་འདྲེས་པ་དང་ (གཞན་ཡང་དོན་དམ་པའི་)སངས་རྒྱས་ཀྱི་ཆོས་(གཾ་གཱའི་ཀླུང་གི་བྱེ་མ་སྙེད་ལས་འདས་པ་)ཐམས་ ཅད་ཀྱི་མཛོད་ཀྱི་གཏེར་ཆེན་པོ་ཡོད་ཀྱང་སེམས་ཅན་དེ་དག་གཟུགས་དང་སྒྲ་དང་དྲི་དང་ རོ་དང་རེག་པ་ལ་ཆགས་པས་སྡུག་བསྔལ་བས་འཁོར་བ་ན་འཁོར་ཏེ་(དོན་དམ་པའི་)ཆོས་ ཀྱི་གཏེར་ཆེན་པོ་དེ་(རང་གཞན་ཀུན་ལ་བཞུགས་པ་)མ་ཐོས་པས་ཐོབ་པར་མ་གྱུར་ཅིང་(གློ་ བུར་དྲི་མ་)ཡོངས་སུ་སྦྱང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག་དེ་ནས་ (ཀུན་རྫོབ་ཀྱི་)དེ་བཞིན་གཤེགས་པ་འཇིག་རྟེན་དུ་བྱུང་སྟེ། བྱང་ཆུབ་སེམས་དཔའི་ནང་དུ་

1-1-16

འདི་ལྟ་བུ(དོན་དམ་པ)འི་ཆོས་ཀྱི་གཏེར་ཆེན་པོ་(རང་གཞན་ཀུན་ལ་བཞུགས་པ་)ཡང་དག་ པར་རབ་ཏུ་སྟོན་ཏོ། །དེ་དག་ཀྱང་ཆོས་ཀྱི་གཏེར་ཆེན་པོ་དེ་ལ་མོས་ནས་རྐོ་སྟེ་དེའི་ཕྱིར་ འཇིག་རྟེན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ རྣམས་ཞེས་བྱ་སྟེ། ཆོས་ཀྱི་གཏེར་ཆེན་པོ་ལྟ་བུ(དེ་ཐོབ་པ)ར་གྱུར་ནས་སེམས་ཅན་རྣམས་ལ་ སྔོན་མ་བྱུང་བ་སྔོན་མ་བྱུང་བའི་གཏན་ཚིགས་ཀྱི་རྣམ་པ་དང་དཔེ་དང་བྱེད་པའི་གཏན་ ཚིགས་དང་(ཆོས་གཏེར་དེ་ཐོབ་པའི་ཐབས་ཀྱི་)བྱ་བ་རྣམས་སྟོན་པ་གཏེར་ཆེན་པོའི་མཛོད་ཀྱི་ སྦྱིན་བདག་ཆགས་པ་མེད་པའི་སྤོབས་པ་དང་ལྡན་ཞིང་(བདེན་པ་གཉི་གས་བསྡུས་ པའི་)སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མང་པོའི་མཛོད་དུ་གྱུར་པ་ཡིན་ ནོ། །རིགས་ཀྱི་བུ་དག་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ཀྱང་དེ་བཞིན་གཤེགས་པའི་མིག་ཡོངས་སུ་དག་པས་སེམས་ཅན་ཐམས་ ཅད་(དོན་དམ་པའི་སངས་རྒྱས་ཀྱི་སྙིང་བོ་ཅན་)དེ་ལྟ་བུར་མཐོང་ནས་(དོན་དམ་གྱི་)དེ་བཞིན་ གཤེགས་པའི་ཡེ་ཤེས་དང་སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་ པའི་མཛོད་(མཁའ་ཁྱབ་ཏུ་ནམ་ཡང་བཞུགས་པའི་གློ་བུར་དྲི་མ་རྣམས་)ཡོངས་སུ་སྦྱང་བའི་ཕྱིར་ བྱང་ཆུབ་སེམས་དཔའ་རྣམས་ལ་ཆོས་སྟོན་ཏོ། །ཞེས་དང༌། རྒྱུད་བླ་མ་རྩ་འགྲེལ་དུ་ཡང༌། ཉོན་མོངས་པ་ནི་(གཏེར་ལ་གཡོགས་པའི་)སའི་མཐིལ་དང་འདྲ་ལ། དེ་བཞིན་གཤེགས་པའི་ ཁམས་(དྷཱ་ཏུ་ཞེས་པ་ཁམས་སུ་བསྒྱུར་ན་ལེགས་པ་སྐབས་གཞན་དུ་ཡོད་ཀྱང་དོན་དམ་གྱི་སྐབས་འདི་ དག་ཏུ་དབྱིངས་སུ་བསྒྱུར་བ་ལེགས་པས་ཕྱི་མ་རྣམས་སུ་ཡང་དྲན་དགོས་པ་)ནི་རིན་པོ་ཆེའི་གཏེར་ བཞིན་ཏེ། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་(རིན་ཆེན་)གཏེར་ནི་ཡོད་

1-1-17

གྱུར་ལ། །མི་དེས་(གཏེར་)དེ་མ་ཤེས་ཤིང་གཏེར་དེ་ཡང༌། །(མི་)དེ་ལ་ང་འདིར་ཡོད་ཅེས་མི་ སྨྲ་ལྟར། །དེ་བཞིན་(དུ་གློ་བུར་དྲི་མའི་)ཡིད་ཀྱི་ནང་(དུ་)ཆུད་(པ་དོན་དམ་གྱི་)རིན་ཆེན་ གཏེར། །(གདོད་ནས་རང་བཞིན་གྱིས་)དྲི་(མ་)མེད་(པའི་ཡོན་ཏན་བསྣན་ལ་)གཞག་(དགོས་མེད་ པ་)དང་(ངོ་བོའི་སྐྱོན་)བསལ་(དགོས་)མེད་(པས་སྤངས་རྟོགས་རང་བཞིན་པ་ཚང་བའི་)ཆོས་ཉིད་ ཀྱང༌། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ ངོ༌། །ཇི་ལྟར་དབུལ་པོའི་ཁྱིམ་ནང་དུ་ནི་རིན་ཆེན་གཏེར་ཆུད་གྱུར་པ་མི་ལ་ནི། །རིན་ཆེན་ གཏེར་བདག་ཡོད་ཅེས་བརྗོད་པར་མི་བྱེད་(གཏེར་)དེ་ནི་མི་ཡིས་ཤེས་མིན་ལྟར། །དེ་བཞིན་ (དོན་དམ་པའི་)ཆོས་གཏེར་ཡིད་ཀྱི་ཁྱིམ་གནས་སེམས་ཅན་དག་ནི་དབུལ་པོ་ལྟ་བུ་ སྟེ། །(སེམས་ཅན་)དེ་དག་རྣམས་ཀྱིས་(གཏེར་)དེ་ཐོབ་(པར་)བྱ་ཕྱིར་(ཆོས་སྟོན་པ་ལ་)འཇིག་ རྟེན་དུ་ནི་དྲང་སྲོང་ཡང་དག་བལྟམས་(ཏེ་ཀུན་རྫོབ་ཀྱི་སངས་རྒྱས་གཞན་སྣང་ལ་བྱོན་)། །ཞེས་ གསུངས་སོ། །དེ་དང་རྗེས་སུ་མཐུན་པར། ཡོངས་སུ་མྱ་ངན་ལས་འདས་པ་ཆེན་པོ་ལྷའི་ཟླ་ བས་བསྒྱུར་བ་ལས་ཀྱང༌། བཅོམ་ལྡན་འདས་ཅི་ལགས་སྲིད་པ་ཉི་ཤུ་རྩ་ལྔ་བདག་མཆིས་ ཞེས་བགྱི་འམ་མ་མཆིས་ཞེས་བགྱི། བཀའ་བསྩལ་པ། བདག་ཅེས་བྱ་བ་ནི་(སྐབས་འདིར་དེ་ བཞིན་ཉིད་བདག་དག་པའི་བདག་ཡིན་པས་)དེ་བཞིན་གཤེགས་པའི་སྙིང་པོའི་དོན་ཏོ། །སངས་ རྒྱས་ཀྱི་ཁམས་(ཏེ་དྷཱ་དུ་ཞེས་པ་དབྱིངས་)ནི་སེམས་ཅན་ཐམས་ཅད་ལ་ཡོད་མོད་ཀྱི་དེ་ཡང་ ཉོན་མོངས་པའི་རྣམ་པ་(མང་པོ་)རྣམས་ཀྱིས་བསྒྲིབས་ཏེ། བདག་ཉིད་ལ་ཡོད་བཞིན་དུ་ སེམས་ཅན་རྣམས་ཀྱིས་མཐོང་བར་མ་ནུས་སོ། །འདི་ལྟ་སྟེ། དཔེར་ན་གྲོང་ཁྱེར་ཆེན་པོ་ཞིག་ ན་དབུལ་བོའི་ཁྱིམ་ཞིག་ན་གསེར་གྱི་གཏེར་ཟད་མི་ཤེས་པ་ཞིག་ཡོད་ལ། དེ་ལ་བུད་མེད་

1-1-18

དབུལ་མོ་ཞིག་འདུག་པ་དེས་ཀྱང་བདག་གི་ཁྱིམ་གྱི་སའི་འོག་ན་གཏེར་ཡོད་པར་མི་ཤེས་ ཏེ། དེར་ཐབས་དང་ལྡན་པའི་མི་ཞིག་གིས་བུད་མེད་དེ་ལ་སྨྲས་པ་ཞེས་པ་ནས་ཁྱོད་ཉིད་ཀྱི་ ཁྱིམ་ན་གཏེར་ཡོད་མོད་ཀྱི་ཁྱོད་བདག་(ཉིད་ཀྱིས་)ཀྱང་མི་ཤེས་ན་གཞན་གྱིས་ལྟ་ཤེས་པར་ ག་ལ་ནུས། དེ་ནས་(གཏེར་)དེ་བདག་གིས་ཐོབ་པར་འཚལ་ལོ་ཞེས་(དབུལ་མོ་)དེས་(དམ་ པ་)དེ་ལ་གསོལ་བ་འདེབས་སོ། །དེ་ནས་(དམ་པ་)དེས་ཁྱིམ་དེའི་ནང་ནས་གཏེར་དེ་བརྐོས་ ནས་(དབུལ་མོ་)དེ་ཉིད་ལ་བྱིན་ནོ། །དེ་ནས་(དབུལ་མོ་)དེས་(གཏེར་)དེ་མཐོང་ནས་ངོ་མཚར་ དུ་གྱུར་ཏེ། (དམ་པ་)དེ་ལ་སྐྱབས་སུ་སོང་བ་དེ་བཞིན་དུ་རིགས་ཀྱི་བུ་དེ་བཞིན་གཤེགས་ པའི་སྙིང་པོ་ནི་སེམས་ཅན་ཐམས་ཅད་ལ་ཡོད་ལ་མཐོང་བར་མ་ནུས་པ་ཙམ་དུ་ཟད་དེ་ བུད་མེད་བུལ་མོ་དེ་ཉིད་ལ་གཏེར་ཡོད་པ་དང་འདྲའོ། །རིགས་ཀྱི་བུ་ད་ངས་སེམས་ཅན་ ཐམས་ཅད་ལ་དེ་བཞིན་གཤེགས་པའི་སྙིང་པོ་(དོན་དམ་པའི་ཆོས་རྣམས་ཀྱི་གཏེར་ཆེན་)ཡོད་ དོ་ཞེས་ཡང་དག་པར་བསྟན་པར་བྱ་སྟེ། །ཇི་ལྟར་དབུལ་མོ་དེས་གཏེར་ཆེན་པོ་ཡོད་པར་ བསྟན་ཀྱང་(སྒྲིབ་གཡོགས་མ་བསལ་ན་མངོན་སུམ་གྱིས་)མི་ཤེས་པ་དེ་བཞིན་དུ་སེམས་ཅན་ ཐམས་ཅད་ལ་དེ་བཞིན་གཤེགས་པའི་སྙིང་པོ་(དོན་དམ་པའི་ཆོས་རྣམས་ཀྱི་གཏེར་ཆེན་)ཡོད་ པ་ཡང་ཉོན་མོངས་པའི་རྣམ་པ(མང་པོ)ས་བསྒྲིབས་པས་སེམས་ཅན་རྣམས་ཀྱིས་མི་ཤེས་ ཤིང་མ་མཐོང་ནས་དེ་དག་ལ་དེ་བཞིན་གཤེགས་པས་བསྟན་ཏེ་དེ་དག་མགུ་ནས་དེ་བཞིན་ གཤེགས་པ་ལ་སྐྱབས་སུ་འགྲོའོ་ཞེ་པ་ལ་སོགས་པ་དང༌། དེ་བཞིན་དུ་མྱང་འདས་ཆེན་པོ་ རྒྱ་ནས་བརྒྱུད་པར་ཡང་རིགས་ཀྱི་བུ་ངས་ཀྱང་འདི་སྐད་དུ་སེམས་ཅན་གྱི་སངས་རྒྱས་ཀྱི་ རང་བཞིན་ནི་དཔེར་ན་བུད་མེད་དབུལ་མོའི་ཁྱིམ་གྱི་རིན་པོ་ཆེའི་གཏེར་དང་

1-1-19

(གྱད་)སྟོབས་པོ་ཆེའི་དཔྲལ་བའི་རིན་པོ་ཆེའི་ནོར་བུ་རྡོ་རྗེ་དང་འཁོར་ལོས་བསྒྱུར་བའི་ རྒྱལ་པོའི་ཟིལ་དངར་གྱི་ཆུ་མིག་དང་མཚུངས་སོ། །ཞེས་པ་ལ་སོགས་པ་རབ་ཏུ་རྒྱས་པར་ བཞུགས་ཤིང༌། རྣམ་པར་མི་རྟོགས་པ་ལ་འཇུག་པའི་གཟུངས་སུ་ཡང༌། རིགས་ཀྱི་བུ་དག་ འདི་ལྟ་སྟེ་དཔེར་ན་བྲག་གཅིག་ཏུ་མཁྲེགས་ཤིང་སྲ་བའི་འོག་ན་ཡིད་བཞིན་གྱི་ནོར་བུ་ རིན་པོ་ཆེ་ཆེན་པོ་སྣ་ཚོགས་འོད་གསལ་བ་འདི་ལྟ་སྟེ་དངུལ་རིན་པོ་ཆེ་དང་གསེར་རིན་པོ་ ཆེ་དང་རྡོའི་སྙིང་པོ་རིན་པོ་ཆེ་ཐ་དད་པས་ཡོངས་སུ་གང་བའི་གཏེར་ཆེན་པོ་ཞིག་ཡོད་ལ་ དེ་ནས་གཏེར་ཆེན་པོ་འདོད་འི་མི་ལ་ལ་ཞིག་འོངས་པ་དེ་ལ་གཏེར་ཆེན་པོ་མངོན་པར་ ཤེས་པའི་མིས་འདི་སྐད་དུ་ཀྱེ་སྐྱེས་བུ་བྲག་གཅིག་ཏུ་མཁྲེགས་ཤིང་སྲ་བ་དེའི་འོག་ན་རིན་ པོ་ཆེ་འདྲ་གསལ་བས་ཡོངས་སུ་གང་བའི་རིན་པོ་ཆེའི་གཏེར་ཆེན་པོ་ཡོད་དེ་དེའི་འོག་ན་ ཡིད་བཞིན་གྱི་ནོར་བུ་རིན་པོ་ཆེའི་གཏེར་ཡོད་ཀྱིས་ཁྱོད་ཀྱིས་ཐོག་མ་ཁོ་ནར་རྡོའི་རང་ བཞིན་ཐམས་ཅད་རྐོས་ཤིག དེ་རྐོས་དང་དངུལ་དུ་སྣང་བའི་རྡོ་ཁྱོད་ལ་སྣང་བར་འགྱུར་ ཏེ་དེ་ལ་ཁྱོད་ཀྱིས་གཏེར་ཆེན་པོར་འདུ་ཤེས་མི་བྱའི། དེ་ཡོངས་སུ་ཤེས་པར་བྱོས་ཏེ་རྐོས་ ཤིག དེ་རྐོས་དང་གསེར་དུ་སྣང་བའི་རྡོ་སྣང་བར་འགྱུར་ཏེ། དེ་ལ་ཡང་ཁྱོད་ཀྱིས་གཏེར་ ཆེན་པོར་འདུ་ཤེས་མི་བྱའི། དེ་ཡང་ཡོངས་སུ་ཤེས་པར་བྱོས་ཏེ་རྐོས་ཤིག དེ་རྐོས་དང་ རིན་པོ་ཆེ་སྣ་ཚོགས་སུ་སྣང་བའི་རྡོ་སྣང་བར་འགྱུར་ཏེ་དེ་ལ་ཡང་ཁྱོད་ཀྱིས་གཏེར་ཆེན་ པོར་འདུ་ཤེས་མི་བྱའི་དེ་ཡང་ཡོངས་སུ་ཤེས་པར་བྱོས་ཏེ་རྐོས་ཤིག ཀྱེ་སྐྱེས་བུ་ཁྱོད་ཀྱིས་ དེ་ལྟར་བརྩོན་པར་བྱས་ན་(ཕྱིས་)རྐོ་བའི་མངོན་པར་འདུ་བྱ་བ་མེད་ཅིང་འབད་མི་དགོས་ པར་ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་མཐོང་བར་འགྱུར་རོ། །ཡིད་བཞིན་